Жаңалықтар

Мәңгі, тұрақты күнтізбеге арналған «Жаһандық жаңалық» қонференциясы өтті

Бүгін, 2020 жылдың 18 қыркүйек күні Халықаралық Түркі академиясы ұйымдастыруымен және Қазақстан Республикасының Ұлттық академиялық кітапханасының қолдауымен ғаламдық, яғни мәңгі, тұрақты күнтізбеге арналған «Жаһандық жаңалық» атты конференция  өтті.

Алқалы жиынға Халықаралық Түркі академиясының президенті, ҚР ҰҒА академигі, тарих ғылымдарының докторы Дархан Қыдырәлі,  Қазақстанның еңбек сіңірген қайраткері,  Халықаралық Жоғары Мектеп ғылым академиясының академигі, филология ғылымдарының докторы, профессор Әділ Ахметов, Халықаралық Акмеология ғылым академиясының  академигі, халықаралық Платон сыйлығының иегері  Сайлыбай Бекболатов, мемлекет және қоғам қайраткерлері, ғалымдар, зиялы қауым өкілдері қатысты.

Басқосуға арқау болған тақырып қос ғалымның екеуі де мәңгі тұрақты күнтізбе туралы түйінді жаңалықтармен баяндама жасап, ежелгі түркілік танымнан бастау алған 13 ай/28 күндік мәңгі тұрақты күнтізбенің адамзатқа беретін тағылымы жайында  пайымды пікірлерімен бөлісті.

Айта кетейік, биыл жаңа күнтізбені ойлап тапқан ғалым С. Бекболатовтың Оңтүстік Африка мемлекетінде ағылшын тілінде жарық көрген «Unified, Constant Calender» («Мәңгі тұрақты күнтізбе») атты монографиясы ғылыми жаңалық ретінде Батыс елдеріне кең таралып, Google ғаламтор жүйесіне ресми тіркелді. Тұрақты, мәңгі күнтізбенің электрондық нұсқасы жасақталып, ол да Google талаптарына сәйкес тіркеліп, ресми айналымға енгізілді.

Осылайша, қазақ ғалымы Сайлыбай Бекболатов астрономия, жаратылыстану, математика және ядролық физика секілді іргелі ғылымдармен қатар, Киелі кітаптарда тұрған дереккөздерді пайдалана отырып, жыл санау жүйесі бойынша өзінің ашқан жаңалығын жариялады.

Бұл орайда, Майя өркениетіндегі күнтізбелер жүйесінің ғылыми негіздерін ширек ғасыр бойы зерттеген ғалым, Қазақстанның еңбек сіңірген қайраткері, филология ғылымдарының докторы Әділ Ахметов қол жеткізген нәтижелері де өзімен әріптес ғалым Сайлыбай Бекболатов зерттеулерінің жүйелі екенін дәлелдейді.

Close