Жаңалықтар

Өзбекстанда Тұңғыш Президентті еске алу күні жарияланды

1467

Өзбекстан басшысы Шавкат Мирзиёев 25-ші қаңтар күні «Өзбекстан Республикасының Тұңғыш Президенті Ислам Әбдіғаниұлы Каримовті мәңгі есте сақтау туралы» қаулыға қол қойды.

Ол құжатқа сәйкес, Ислам Каримов қайтыс болған күн – 2-ші қыркүйек Өзбекстанда «Тұңғыш Президентті еске алу күні» деп жарияланды. Құжатта Өзбекстанда жыл сайын 30 қаңтарда Ислам Каримовтің туған күні аталып өтеді делінген.

Сонымен қатар, Өзбекстан басшысы Самарқандағы И.Каримов жерленген алаңға мемориалды кешен салуды және Ташкент, Самарқан мен Қаршы қалаларында тұңғыш президентке арнап ескерткіш тұрғызуды тапсырды.

Бұдан бөлек, қаулыға сәйкес, Өзбекстанның тұңғыш президенті ұзақ жыл қызмет атқарған Оксарой резиденциясында Ислам Каримов атындағы Ғылыми-ағартушылық мемориалды кешен құрылып, сол жерде Ислам Каримов атындағы Республикалық қайырымдылық қоғамдық қор жұмыс істейтін болады.

Шавкат Мирзиёевтің қаулысымен Самарқанда Ислам Каримов атындағы музей ашылып, Ташкент мемлекеттік техникалық университеті, Асака қаласындағы автомобиль зауыты, Ферғанадағы Мәдениет сарайы мен Ташкент халықаралық әуежайы тұңғыш президенттің атымен аталады. Сондай-ақ құжатта елдегі бірқатар облыстар мен Ташкенттегі көшелерге И.Каримовтің атын беру туралы жазылған. Бұдан былай жоғары оқу орындарының студенттеріне Өзбекстан басшысының қаулысымен Ислам Каримов атындағы Мемлекеттік шәкіртақы тағайындалады.

Айта кету керек, тәуелсіз Өзбекстан Республикасының тұңғыш президенті Ислам Әбдіғаниұлы Каримов 2016 жылдың 2-ші қыркүйегінде 79 жасқа қараған шағында дүние салды.


Ай:
Жыл:

Тізімге қайта оралу

Оқырмандарға

Биография /

Барлығы