Академия басшысы «Ислам өркениетінің дамуына түркі халықтарының қосқан үлесі» атты халықаралық конференцияға қатысты

2022-05-06 17:53:03 18

Бүгін Түркістан қаласында Қазақстан мұсылмандары діни басқармасының ұйымдастыруымен «Ислам өркениетінің дамуына түркі халықтарының қосқан үлесі» атты халықаралық ғылыми конференция өтті.

Конференцияға Түркі мемлекеттері ұйымының Бас хатшысы Бағдат Әміреев, Халықаралық Түркі академиясының президенті Дархан Қыдырәлі, Қазақстан Респбликасының Ақпарат және қоғамдық даму министрі Асқар Омаров, Түркістан облысының әкімі Өмірзақ Шөкеев, Түркі мемлекеттері ұйымы Ақсақалдар кеңесінің мүшесі Икрам Адырбекұлы, Қазақстан мұсылмандары діни басқармасының төрағасы, Бас мүфти Наурызбай қажы Тағанұлы, Түркия Республикасы Дін істері басқармасының басшысы, Бас мүфти Әли Ербаш, Кавказ мұсылмандары басқармасының төрағасы, Бас мүфти Аллашүкір Паша-Заде, Қырғызстан мұсылмандары діни басқармасының төрағасы, Бас мүфти Замир Ракиев, Өзбекстан мұсылмандары басқармасының бірінші орынбасары Хамитжан Ишматбеков, ҚМДБ Ғұламалар кеңесінің, Ақсақалдар кеңесінің мүшелері, ғалымдар мен облыс бас имамдары қатысты. 

Алқалы жиында сөз алған Академия басшысы Д. Қыдырәлі Түркі дүниесінің ислам өркениетіне және адамзат тарихына қосқан орасан зор үлесі туралы баяндама жасап, конференцияның сәтті өтуіне тілектестік білдірді.

Айта кету керек, конференцияда түркі дүниесіне ортақ Қорқыт ата, Ахмет Ясауи, Мәуләна, Науаи, Манас мұраларын дәріптеу, Матуриди сенім мектебі мен Әбу Ханифа мәзһабын халыққа жеткізу мәселелері сөз болды.